ភ្នំពេញៈ នាឱកាសអញ្ជើញជាគណៈអធិបតី នៃពិធីបើកវិញ្ញសាប្រឡងពុទ្ធិកមធ្យមសិក្សាបឋមភូមិ ឬ ឌីប្លូមសាលាបាលី នៅឯពុទ្ធិកវិទ្យាល័យព្រះសុរាម្រឹត រាជធានីភ្នំពេញ នាព្រឹកថ្ងៃទី១ ខែកុម្ភៈ ឆ្នាំ២០២៣ នេះឯកឧត្តម សេង សុមុនី ជាអតីតបណ្ឌិតសង្ឃមួយអង្គ បច្ចុប្បន្នជាអនុរដ្ឋលេខាធិការក្រសួងធម្មការ និងសាសនា បានមានប្រសាសន៍ចែករំលែក និងផ្តាំផ្ញើដល់បេក្ខសមណៈ ៣ ចំណុច ដើម្បី ថែរក្សាការពារ និងលើកតម្កើងនូវភាពផូរផង់ នៃព្រះពុទ្ធសាសនា គឺ៖

ទី១. ថែរក្សាសុខភាពឱ្យបានល្អ ទាំងសុខភាពផ្លូវកាយ និង សុខភាពផ្លូវចិត្ត ដ្បិតសុខភាពគឺជាកត្តាចម្បងប្រសិនបើមានបញ្ហាសុខភាព មិនថាសុខភាពផ្លូវកាយ ឬ សុខភាពផ្លូវចិត្តទេ អ្វីៗទាំងអស់ នឹងមានបញ្ហា ។

ទី២. គោរពប្រតិបត្តិធម៌ និង វិន័យជាពុទ្ធប្បញ្ញត្តិឱ្យបានត្រឹមត្រូវ ស័ក្តិសមជាសមណៈ ជាស្រែបុណ្យ និង ជាទីជ្រះថ្លា នៃ ជនានុជនពីគ្រង់ទិសានុទិស ។ 

ទី៣. សិក្សារៀនសូត្រទាំងផ្លូវលោក និងផ្លូវធម៌ ទាំងផ្នែកទ្រឹស្តី ទាំងផ្នែកបដិបត្តិ ពីព្រោះវិជ្ជាផ្លូវលោក និង ផ្លូវធម៌ ពុំអាចផ្តាច់ចេញពីគ្នាបានទេ ខណៈប្រសិនបើសិក្សាផ្នែកទ្រឹស្តី ប៉ុន្តែពុំបានប្រតិបត្តិ ក៏ពុំអាចចេញជាលទ្ធផល ហើយប្រសិនបើអនុវត្ត ដោយពុំបានសិក្សាស្វែងយល់ទ្រឹស្តីជាមគ្គុទេសទេនោះ ក៏ពុំប្រសើរ ។

ស្រដៀងគ្នានេះដែរ សម្តេចព្រះពោធិវ័ង្ស អំ លឹមហេង ព្រះអគ្គាធិការរងពុទ្ធិកសិក្សាជាតិ បានបន្ថែមថា «ចំពោះការប្រតិបត្តិធម៌ និងវិន័យនោះ តោងតែអនុវត្តឱ្យបានខ្ជាប់ខ្ជួន សមដូចព្រះពុទ្ធភាសិតថា វិនយោ សាសនស្សមូលំ ប្រែថា វិន័យគឺជាឫសគល់ នៃ ព្រះពុទ្ធសាសនា »។ 

សម្តេចបានបន្ថែមថា « ព្រះសង្ឃតំណាងឱ្យព្រះពុទ្ធសាសនា ប្រសិនបើព្រះសង្ឃពុំបានប្រតិបត្តិធម៌ និងវិន័យជាពុទ្ធប្បញ្ញត្តិ និងពុទ្ធានុញ្ញត្តិដែលជាសិក្ខាបទរបស់ខ្លួនទេនោះ បានសេចក្តីព្រះពុទ្ធសាសនាដាច់ឫស រលើងគល់ ហើយការគោរពធម៌ វិន័យនោះទៀតសោត ក៏រួមទាំងការគោរពវិន័យបញ្ញត្តិ នៃការប្រឡងនាឱកាសនេះ ក៏ដូចជាការប្រឡងផ្សេងៗទៀតដែរ ដើម្បី ថែរក្សាការពារនូវកិត្តិនាមដ៏ផូរផង់ នៃ ការប្រឡងគ្រប់ប្រភេទនៅក្នុងក្រខណ្ឌពុទ្ធិកសិក្សា » ។

សូមជម្រាបថា ការប្រឡងពុទ្ធិកមធ្យមសិក្សាបឋមភូមិ ឬ ឌីប្លូមសាលាបាលី នាឆ្នាំនេះ មាន ៣ មណ្ឌល គឺមណ្ឌលភ្នំពេញ មណ្ឌលបាត់ដំបង និង មណ្ឌលកំពង់ចាម ដោយចែកចេញជា ៤៨ បន្ទប់ មានបេក្ខសមណៈសរុប ១ ១៩០ អង្គ ដែលចំនួននេះ បានកើនឡើង ២១ អង្គ បើធៀបទៅនឹងកាលពីឆ្នាំ២០២២ ។

ចំណែកវិញ្ញាសាឆ្នាំ២០២៣ នេះ មានចំនួន ១៣ វិញ្ញសា គឺភាសាបាលី ភាសាខ្មែរ គីមីវិទ្យា ព្រះវិន័យ និងអភិធម្ម ភាសាសំស្ក្រឹត រូបវិទ្យា ផែនដីវិទ្យា ភូមិវិទ្យា គណិតវិទ្យា ជីវវិទ្យា ភាសាអង់គ្លេស ប្រវត្តិវិទ្យា សីលធម៌ និង ពលរដ្ឋវិទ្យា ៕

ដោយៈ រាជ មេសា