ជីវិតជាអ្នកសិល្បៈបុរាណល្ខោនបាសាក់ ជាអាជីពមួយដែលមិនសូវមានអ្នកចាប់អារម្មណ៍នោះទេ។ 

អាជីពមួយនេះ ក៏មិនសូវជាទទួលបានប្រាក់កំរៃច្រើនផងដែរ ប៉ុន្តែល្ខោនបាសាក់នៅតែទម្រង់សិល្បៈនៃការសម្តែងរបស់ខ្មែរដែលមហាជន នៅតែនិយមទស្សនា និង ឱ្យតម្លៃ។

នៅពេលមានបុណ្យទាន តាមភូមិស្រុក ឫ តាមវត្តនានា ម្តងៗ នៅពេលយប់ គេតែងសង្កេតឃើញមានការសម្តែងល្ខោនបាសាក់សម្រាប់ជាការអបអរផង និង ជាការចូលរួមអភិរក្សនូវសិល្បៈបុរាណរបស់ខ្មែរយើងផង។ មនុស្សម្នា បានយកកន្ទេលក្រាលដេកចាំមើលនូវការសម្តែងទាំងនោះ រហូតទល់ភ្លឺទៀតផង។​​ចុះជីវិតអ្នកតួសម្តែងល្ខោនបាសាក់ មានភាពលំបាកបែបណា? ពិតណាស់ ជីវិតនៅក្រោយឆាក មិនសូវមានអ្នកដឹងនោះទេ។

អ្នកសម្តែងលោ្ខនបាសាក់ម្នាក់ បានថ្លែងប្រាប់ក្រុមការងារផ្កាស្លាធីវី ឱ្យដឹងយ៉ាងដូច្នេះថា “នៅពេលចុះសម្តែងតាមខេត្តម្តងៗ ត្រូវរង់ចាំរហូតដល់ការសម្តែងបញ្ចប់រហូតដល់ម៉ោង ៦ទៀបភ្លឺឯណោះ។” ចំណែកឯប្រាក់កំរៃវិញ គឺបានតែគ្រប់គ្រាន់សម្រាប់ការចំណាយប្រចាំថ្ងៃ បើឱ្យសល់លុយវិញ គឺមិនសល់នោះទេ។ អ្នកសម្តែងល្ខោនខាងលើថ្លែងបញ្ជាក់។

សរុបមកវិញ ល្ខោនបាសាក់ជាទម្រង់សិល្បៈសម្តែងបុរាណរបស់ខ្មែរ ដែលពេញនិយមខ្លាំងក្នុងស្រទាប់មហាជន គ្រប់ស្រទាប់វណ្ណៈ រហូតមកទល់ពេលបច្ចុប្បន្ននេះ៕

អត្ថបទ ៖ សីហរិទ្ធ