តារាចម្រៀង ពូឃ្លាំង លេចមុខជាថ្មីនៅក្នុងវិស័យភាពយន្ត ដែលកាលពីពេលថ្មីៗនេះ គេឃើញលោកចូលរួមសម្តែងនៅក្នុងរឿងថ្មីមួយរបស់ផលិតកម្ម LD គឺរឿង លង់ស្នេហ៍ពូ។ រឿងមួយនេះ កំពុងចាក់បញ្ចាំងនៅតាមរោងភាពយន្តទំនើបនានា។ 


បើទោះបីជាចូលវ័យកាន់តែច្រើន ប៉ុន្តែពូឃ្លាំង នៅតែមានរូបរាងសង្ហារ និង ភាពល្បីល្បាញរបស់លោកលើវិស័យចម្រៀងរ៉េប កាន់តែសុះសាយ។ កាលពីពេលថ្មីៗនេះ តារាចម្រៀងរ៉េបជើងចាស់រូបនេះ បានចូលរួមសម្តែងនៅក្នុងខ្សែភាពយន្តមួយរបស់ផលិតកម្ម LD ដែលមានចំណងជើងថា “លង់ស្នេហ៍ពូ” ។ រឿងនេះមានការចូលរួមសម្តែងពីតារាកំប្លែង នាយគ្រឿន ឌីជេ កាកា លីម ជាឡាយ សារ៉ាយ សក្ខណា និង តារាសម្តែងមួយចំនួនទៀតផងដែរ។ 

និយាយទៅដល់ចម្រៀងរបស់ពូឃ្លាំង ឃើញថាបទក្រោយៗរបស់លោក ទទួលបានការគាំទ្រនិងពេញនិយម សម្រាប់ស្រទាប់យុវវ័យ តួយ៉ាងដូចជាបទ យប់នេះមិនអោយអូនគេងទេ បទគ្រលាស់ និងបទ Threesome ជាដើម។ ចំពោះបទចាស់ៗរបស់លោកវិញ ក៏នៅតែរក្សាបានការសណ្តាប់ច្រើនដូចគ្នា ដូចជាបទ ជួយថែសិល្បៈដូនតា យក្សកើតអេដស៍ សារ៉ាវ៉ាន់ហ៊ីបហប់ និងបទ ដំណឹងល្អ ដែលជាបទចាស់ៗធ្លាប់ផ្ទុះខ្លាំង កាលពីពេលជំនាន់នោះ៕

ដោយ៖ សីហរិទ្ធ