ភ្នំពេញៈ ឯកឧត្តម ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយកមូលនិធិជាតិជំនួយសង្គម បានថ្លែងទៅកាន់គ្រួសារសពនិវត្តជន ថា « សូមបងប្អូន អ៊ំ ពូ មីង មេត្តាយកថវិកាទាំងនេះ ទៅប្រើប្រាស់ឱ្យចំគោលដៅ ឱ្យមានប្រយោជន៍ និងឱ្យមានអត្ថន័យបំផុត ដើម្បី ជាការអរគុណដល់អ្នកដែលបានទទួលមរណភាព » ។ 

ឯកឧត្តម ឈួរ សុបញ្ញា មានប្រសាសន៍យ៉ាងដូច្នេះ នៅក្នុងពិធីសំណេះសំណាល និងប្រគល់ប្រាក់ធានារ៉ាប់រងសង្គម ប្រាក់បូជាសព និងប្រាក់ឧបត្ថម្ភមួយលើក ជូនគ្រួសារសពនិវត្តជន ជនបាត់បង់សមត្ថភាពការងារ និងជនពិការ ដែលបានទទួលមរណភាព នាព្រឹកថ្ងៃទី២ ខែមីនា ឆ្នាំ២០២៣ នេះ ។

ពិធីសំណេះសំណាល និងប្រគល់ថវិកាជូនគ្រួសារសពនិវត្តជន ជនបាត់បង់សមត្ថភាពការងារ និងជនពិការ ដែលបានទទួលមរណភាព ។

ឯកឧត្តមប្រតិភូរាជរដ្ឋាភិបាល ដែលមានវ័យក្មេងជាងគេ រូបនេះ បានបន្ថែមថា ការយកថវិកាមួយផ្នែក ទៅធ្វើបុណ្យទាន ឧទ្ទិសកុសលជូនអ្នកដែលបានចែកឋានទៅ គឺជារឿងល្អហើយ ប៉ុន្តែសំខាន់បំផុត គឺត្រូវគិតដល់មនុស្សដែលនៅរស់ ។ ការប្រើប្រាសថវិការតាមការបង្រៀនរបស់ព្រះពុទ្ធសាសនា គឺជាមធ្យោបាយល្អបំផុត ដែលត្រូវចែកជា ៥ ចំណែក គឺ ១ផ្នែកសម្រាប់ផ្គត់ផ្គង់ជីវភាពប្រចាំថ្ងៃរបស់អ្នកដែលនៅរស់ ១ ផ្នែកសម្រាប់គិតគួរអំពីសុខភាពរបស់ខ្លួន ១ ផ្នែកសម្រាប់អនុគ្រោះដល់អនុជន ពោលគឺកូន ចៅ ជាដើម ១ផ្នែកធ្វើទានតាមសមគួរជាពិសេទុរគតជន និង ១ ផ្នែកទៀតសម្រាប់សន្សំទុកនៅពេលចូលវ័យចំណាស់ ឬ ប្រើប្រាស់នៅពេលត្រូវការនៅពេលក្រោយ ។

ឯកឧត្តម ឈួរ សុបញ្ញា បានពន្យល់បន្ថែមថា ក្នុងបរិបទនេះ ប្រសិនបើអាចយកថវិកាទាំងនេះ ទៅបង្កើតមុខរបរដែលអាចរកប្រាក់ចំណូល រួមចំណែកទ្រទ្រង់ដល់ជីវភាពរបស់អ្នកដែលកំពុងរស់នៅ ទៅថ្ងៃអនាគតនោះ គឺជាការដឹងគុណដ៏ល្អប្រពៃបំផុតមួយ ចំពោះអ៊ំ ពូ មី បង ប្អូន ដែលបានធ្វើមរណកាលទៅ ហើយនោះក៏គឺជាការអរគុណ និងដឹងគុណចំពោះរាជរដ្ឋាភិបាលដែរ ពីព្រោះថា ការណ៍ដែល អ៊ំ ពូ មី បង ប្អូន ដែលកំពុងរស់នៅមានក្តីសុខ មានសុភមង្គ គឺជាបំណងប្រាថ្នាដ៏ពិសិដ្ឋ របស់អ្នកដែលបានធ្វើមរណកាលទៅ និងជាក្តីប្រាថ្នារបស់រាជរដ្ឋាភិបាលកម្ពុជា ។

សូមជម្រាបថា ប្រាក់ធានារ៉ាប់រងសង្គម ប្រាក់បូជាសព និងប្រាក់ឧបត្ថម្ភមួយលើក ដែលត្រូវបានប្រគល់ជូននៅព្រឹកនេះ មានចំនួន ៥១ គ្រួសារ ក្នុងនោះ នៅក្នុងរាជធានីភ្នំពេញ ៣៣ គ្រួសារ និងមកពីខេត្តកណ្តាល ១៨គ្រួសារ ដោយរាជរដ្ឋាភិបាល ត្រូវចំណាយថវិកាអស់ជាង ៤៦៤ លាន ៥ សែនរៀល ឬជិត ១២ ម៉ឺនដុល្លារអាម៉េរិក ៕

ដោយៈ រាជ មេសា