ចូលដើមឆ្នាំ ២០២៣ តារាកំប្លែងនាយពែកមី ហាក់មានយីអ៊ុនឡើងស្រឺតៗ ដោយកាលពីពេលថ្មីៗនេះទទួលបានការសរសើរពីសំណាក់ សម្តេចតេជោ ហ៊ុន សែន នាយករដ្ឋមន្រ្តីកម្ពុជា។ 

នាយពែកមី បានបង្ហោះវីដេអូឃ្លីបមួយនៅលើបណ្តាញសង្គមហ្វេសប៊ុក ដោយវីដេអូនោះនាយបានបរិយាយថា អ្នកជិតខាងបានដាំដើមស្វាយហើយមែកស្វាយបានចូលដីរបស់ខ្លួន។ ពាក់ព័ន្ធនឹងបញ្ហានេះ នាយពែកមី បានបកស្រាយថា ពីដំបូងអ្នកជិតខាងចង់កាប់មែកស្វាយនោះចេញ ដើម្បីកុំឱ្យប៉ះពាល់ដល់ផ្ទះរបស់រូបលោក ប៉ុន្តែតារាកំប្លែងរូបនេះ បានតបទៅវិញថាមិនបាច់កាប់ចេញទេ ទុកអញ្ចឹងទៅបានម្លប់ផង ហើយណាមួយទៀតនៅពេលដល់រដូវចេញផ្លែ បានបេះហូបផង។ 

រំលងបានប៉ុន្មានថ្ងៃ វីដេអូឃ្លីបរបស់នាយពែកមី បានល្បីទៅដល់សម្តេចតេជោ។ សម្តេចតេជោ លោកមានប្រសាសន៍ដោយបានបង្ហោះនៅលើឆាណែល តេឡេក្រាមផ្លូវការរបស់សម្តេច ថា “សូមកោតសរសើរលោកកូន ពែកមី និង គ្រួសារមួយទៀតដែលខ្ញុំមិនបានស្គាល់ឈ្មោះ ដែលចេះសម្រួលគ្នា និង រស់នៅជាមួយគ្នាដោយសុខសាន្ត។ សូមមើលវីដេអូនេះ និង ផ្តល់នូវការពន្យល់គ្រប់គ្រាន់អំពីរបៀបរស់នៅជិតខាងគ្នា” ៕

ដោយ៖ សីហរិទ្ធ